வேலைவாய்ப்பற்ற இளைஞர்களுக்கு உதவி தொகை

தமிழ்நாட்டில் வேலை வாய்ப்பு அலுவலகத்தில் பதிவு செய்துள்ள வேலைவாய்ப்பற்றோருக்கு உதவித் தொகை வழங்கப்பட்டு வருகிறது. இதை பெறுவதற்கான தகுதிகள் வருமாறு¸ 

1) பள்ளி இறுதி வகுப்பு தேர்ச்சி பெறாதவர்கள், பள்ளியிறுதி வகுப்புத் தேர்ச்சி¸ மேல்நிலைக்கல்வி தேர்ச்சி, பட்டப்படிப்பு கல்வித்தகுதிகள் தேர்ச்சிப் பெற்று¸ வேலைவாய்ப்பு அலுவலகத்தில் பதிவு செய்து தொடர்ச்சியாக பதிவினை புதுப்பித்து வருபவர்கள்.

2) 30.06.2021-ம் தேதியின் நிலவரப்படி ஐந்தாண்டுகளுக்கு மேல் காத்திருப்பவராக இருத்தல் வேண்டும்.  

3) மாற்றுத்திறனாளி பதிவுதாரர்களாக இருப்பின் வேலைவாய்ப்பு அலுவலகத்தில் பதிவு செய்து ஓராண்டு முடிந்திருக்க வேண்டும். 

4) ஆதிதிராவிடர், பழங்குடியினர் 45 வயதிற்கு மிகாமலும்¸ பிற்பட்ட வகுப்பினர், மிகவும் பிற்பட்ட வகுப்பினர், இதர வகுப்பினர் 40 வயதிற்குள்ளும் இருத்தல் வேண்டும்.  

5) குடும்ப ஆண்டு வருமானம் ரூ.72000-க்கு மிகாமல் இருத்தல் வேண்டும்.மாற்றுத்திறாளிகளுக்கு வருமான உச்சவரம்பு இல்லை.

6) ஒரு பதிவுதாரருக்கு ஒருமுறை மட்டுமே உதவித் தொகை வழங்கப்படும்.

10ஆம் வகுப்பு தவறியவர்களுக்கு மாதம் ரூ.200-ம்¸ 10-ம் வகுப்பு தேர்ச்சி பெற்றவர்களுக்கு மாதம் ரூ.300-ம்¸ மேல்நிலைக்கல்வி முடித்தவர்களுக்கு மாதம் ரூ.400-ம் பட்டதாரிகளுக்கு மாதம் ரூ.600-ம் வழங்கப்படுகிறது. 

மாற்றுத்திறனாளிகளுக்கு 10ம் வகுப்பு தேர்ச்சி மற்றும் தேர்ச்சி பெறாதவர்களுக்கு மாதம் ரூ.600-ம்¸ மேல்நிலை வகுப்பு தேர்ச்சி பெற்றவர்களுக்கு மாதம் ரூ750-ம்¸ பட்டதாரிகளுக்கு மாதம் ரூ.1000-ம் உதவித் தொகை வழங்கப்படும்.  

மேற்குறிப்பிட்ட தகுதிகள் உள்ளவர்கள் திருவண்ணாமலை¸ மாவட்ட வேலைவாய்ப்பு அலுவலகத்திலோ அல்லது www.tnvelaivaaippu.gov.in  என்ற வேலைவாய்ப்புத்துறை இணையதளத்திலோ பதிவிறக்கம் செய்து கொள்ளலாம். 

பூர்த்தி செய்யப்பட்ட விண்ணப்ப படிவத்துடன் வருவாய்த்துறையில் வருவாய் ஆய்வாளர் அல்லது அதற்கு மேற்பட்ட அலுவலரிடமிருந்து பெறப்பட்ட சான்றும்¸ தேசியமயமாக்கப்பட்ட வங்கிக் கணக்குப் புத்தகம்¸ ஆதார் அட்டை மற்றும் அனைத்து கல்விச்சான்றுகள் அசல் மற்றும் நகல்களுடன் மாவட்டவேலைவாய்ப்பு அலுவலகத்தில் 31.08.2021-க்குள் விண்ணப்பிக்க வேண்டும்.

இவ்வாறு திருவண்ணாமலை மாவட்ட ஆட்சித்தலைவர் பா.முருகேஷ் தெரிவித்துள்ளார்.